MISS TANZANIA HII HAPA TENA

KAMPUNI ya Bia Tanzania (TBL), kupitia kinywaji cha Redd’s Original pamoja na Kamati ya Miss Tanzania, jana wamezindua rasmi shindano hilo sambamba na kuanza kwa mchakato wa kumpata Miss Tanzania 2014/2015.

Akizungumza jijini Dar es Salaam jana, Meneja wa kinywaji cha Redd’s Original, Victoria Kimaro, alisema wana furaha kutangaza udhamini wa mashindano ya kumsaka mrembo atakayemrithi Happipess Watimanywa.

“Nina imani wote tunakumbuka kuwa mwaka 2012 Redd’s ilisaini mkataba na Lino International Agency, ambao ndio wanaoratibu shindano hilo na kuwa wadhamini wakuu wa shindano hili lenye hadhi yake hapa nchini kwa miaka mitatu, yaani 2012 hadi 2014, hivyo huu ukiwa ndio mwaka wetu wa tatu kwa mujibu wa mkataba, tunayo furaha kubwa kusema kuwa, Redd’s imeweza kutoa mchango wake kwa jamii ya Kitanzania, hususan tasnia hii ya urembo,” alisema Kimaro.

Kimaro aliongeza kuwa, wametenga sh milioni 500 zitakazoendesha shindano hilo katika ngazi zote.

Naye Mkurugenzi wa Lino, Hashim Lundenga, alisema kuwa wao kama waratibu wakuu wana kila sababu ya kuwashukuru Redd’s Original, kwani zaidi ya kuwa mdhamini mkuu kwa miaka mitatu, kinywaji hicho kimekuwa mdau mkubwa wa mashindano haya kwa miaka mingi.

“Kwa niaba ya Lino na wadau wa tasnia ya urembo, tunawapongeza sana Redd’s Original kwa imani yao kubwa na mashindano haya, ambayo hakika sasa yanavutia zaidi,” alisema Lundenga.

Aliongeza kuwa wana imani kubwa kuwa mwisho wa mkataba huo wa miaka mitatu si mwisho wa uhusiano mzuri kati ya Lino International, wadau wa urembo na kinywaji cha Redd’s Original.

Aidha, Lundenga aliweka wazi ratiba ya mashindano hayo, ambako kuanzia Aprili hadi Mei ni ngazi ya wilaya na Juni itakuwa mikoa kabla ya kusitishwa Julai kuupisha mwezi wa Ramadhani.

Baada ya hapo, mashindano yataendelea Agosti katika ngazi za kanda na shindano la taifa litafanyika Septemba katika tarehe itakayotajwa baadaye.