MKUU WA MKOA: HAKUNA EBOLA MWANZA

Mkuu Mkoa wa Mwanza Injinia Evarist Ndikilo akitoa taarifa ya mkoa kuhusu kanusho la kuwepo kwa mgonjwa wa Ebola wilayani Sengerema

Na G.SENGO BLOG, Mwanza

TAARIFA zinazosambazwa kuwa kuna mgonjwa wa Ebola kagundulika wilayani Sengerema mkoani Mwanza, si za kweli.

Akizungumza na waandishi wa habari hii leo jijini Mwanza, Kaimu Mganga Mkuu Mkoa wa Mwanza Dr. Kengia amesema utafiti wa awali kabla ya majibu kamili ya vipimo unatosha kujidhihirisha kuwa mgonjwa aliyedaiwa kufariki dunia hivi majuzi Salome Richard (17) siyo kweli kwamba amefariki kwa Ebola.

Hata hivyo kulikuwa na uchukuaji wa vipimo vya awali ambapo, Majibu ya Vipimo vya awali yamepatikana tarehe 19/10/2014 saa 3:00 asubuhi

VIPIMO WALIVYOPIMA 
1. Dengue fever
2. Chikungunya Virus
Majibu ya vipimo hivyo walionekana ni Hasi (Negative)

VIPIMO VINGINE VINAVYOENDELEA 
(1) Liver function - kuangalia kama ini la mgonjwa ambaye ni marehemu lilikuwa kinafanya kazi vizuri au la.
(2) Bilirubin kuangalia kiwango cha protein kwenye ini kama kilikuwa sahihi au kimeongezeka.

Kaimu Mganga Mkuu Mkoa wa Mwanza Dr. Kengia.

Taratibu zinaendelea kati ya Mkuu wa Maabara ya Taifa na Wizara ya Afya kuhusu sampuli hii kupelekwa Mbeya au jijini Nairobi nchini Kenya kwaajili ya uchunguzi wa virusi ya Ebola au Marbug.

Awali kutokana na hofu ya ugonjwa huo huku taarifa zisizo rasmi zikizidi kusambazwa kwa njia ya mitandao ya simu na internet wananchi wa wilaya ya Sengerema na vijiji vya karibu walihaha katika vyombo vya usafiri husussani daladala wakikataa kugusana kwa kuwa Ebola imeingia Mwanza, huku wafanyakazi na wafanyabiashara wanaoishi mkoani Mwanza na kufanya shughuli zao wilayani Sengerema wakiahirisha kuelekea wilayani humo kutokana na vitisho vya taarifa walizopata.

KITAIFA: ANAYESADIKIWA KUWA KINARA WA UGAIDI ARUSHA , AMEUAWA

TANZANIA DAIMA, Arusha

JESHI la polisi Mkoa wa Arusha limemuua kwa kumpiga risasi mtuhumiwa wa ugaidi, Yahaya Hassan Omari Hela (31) ‘Yahaya Sensei’ mkazi wa Mianzini mjini hapa.

Mtuhumiwa huyo alipigwa risasi ya mguu na kalio la kulia eneo ya Kisongo wilayani Monduli alijaribu kuruka kwenye gari la polisi kwa lengo la kuwatoroka.

Kamanda wa polisi mkoani hapa, Liberatus Sabas aliwaeleza waandishi wa habari ofisini kwake jana kuwa tukio hilo lilitokea Oktoba 19 mwaka huu saa 5 usiku wakielekea kijiji cha Chemchem wilayani Kondoa, Dodoma alikozaliwa mtuhumiwa huyo ili akawaoneshe alipohifadhi mabomu.

Alisema mtuhumiwa huyo ambaye alikuwa mwalimu wa Karate na Judo alikuwa muasisi na kinara wa matukio ya ugaidi yaliojitokeza Jijini Arusha, Zanzibar, Mwanza na Dar es Salaam.

Kamanda Sabas, alisema walifanikiwa kumkamata baada ya kumtafuta muda mrefu kwa kutumia intelijensia ya polisi ya kisasa na hali ya juu kabla ya kumkamata mkoani Morogoro Oktoba 6 na kupelekwa Arusha Oktoba 11.

Alisema mtuhumiwa huyo alipohojiwa alikiri kuratibu matukio mbalimbali ya ugaidi.

Baada ya kupigwa risasi hizo alifariki dunia akiwa njiani kuwahishwa katika hospitali ya Mkoa ya Mount Meru kwa matibabu na kwamba mwili wake katika hospitali hiyo.

Sabas aliyataja baadhi ya matukio mtuhumiwa huyo aliyokiri kuhusika kuwa ni lile la Oktoba 25, 2012 saa 5:30 usiku katika mtaa wa Kanisani Paloti kata ya Sokoini One jijini hapa ambapo yeye na wenzake walitega bomu nyumbani kwa Abdulkarim Idd Jonjo (52) katika chumba alicholala na kumjeruhi.

Kamanda Sabas alisema mtuhumiwa huyo alikiri kushiriki tukio la Mei 5 mwaka 2013 saa 10:30 eneo la Kanisa la Katoliki la Mtakatifu Joseph Mfanyakazi lililopo Olasiti jijini Arusha ambapo aliratibu kurushwa kwa bomu na kusababisha vifo vya watu watatu na majeruhi 56.

Tukio la tatu lilitokea Juni 15 mwaka 2013 saa 11:50 jioni katika Viwanja vya Soweto Kata ya Kaloleni Jijini Arusha, ambapo marehemu na wenzake walirusha bomu na kujeruhi watu 60 na wanne kufariki dunia waliokuwa kwenye mkutano wa kufunga kampeni wa Chama cha Demokrasia na Maendeleo (CHADEMA).

Kamanda Sabas Alitaja matukio mengine aliyokiri kuhusika nayo ni lile la Julai 11 mwaka 2013 eneo la kwa Mrombo jijini hapa, ambapo alishirikiana na wenzake kumwagia tindikali usoni Sheikh Said Juma Makamba.

Tukio jingine ni lile la Februari 12 mwaka 2014 saa eneo la Tindigani Unga limited jijini hapa kwenye msikiti wa Sawiyatu Qadiria, walipommwagia tindikali usoni Sheikh Hassan Bashir.

Tukio la sita la Februari 28 mwaka 2014 saa 5:15 alfajiri huko msikiti wa Bondeni Jijini Arusha, marehemu na wenzake walimwagia tindikali Mistapha Mohamed Kiago na kumjeruhi usoni na shingoni.

Tukio la saba Aprili 13 mwaka 2014 saa 1:30 usiku, eneo la Mianzini, huko nyumba ya kulala wageni na Baa ya Night Park, walirusha bomu na kujeruhi watu kumi na mtu mmoja kusababisha kifo chake.

Kamanda alitaja tukio lingine aliloshiriki ni la Aprili 13 mwaka 2014 la saa 5 eneo la Majengo jijini Arusha, alirusha bomu kwa kushirikina na wenzake na kujeruhi watu wawili Sudi Ali Sudi (37) ambaye ni Mkurugenzi wa Answar Muslim kanda ya Kaskazini na mwenzake Muhaji Hussein Kifea (38) mkazi wa Dare s Salaam.

Tukio la tisa mtuhumiwa huyo anadaiwa kuwa Julai 7 mwaka 2014 saa 4:15 usiku eneo la uzunguni, mgahawa wa vama Traditional Indian uliopo jirani na Viwanja vya Gymkhana alirusha bomu na kujeruhi watu nane.

PONGEZI: INSPECTOR HAROUN AMETIMIZA MIAKA 10 KATIKA NDOA YAKE

Na ELIZABETH JOHN, Dar Es Salaam

MKONGWE wa muziki wa kizazi kipya nchini, Haruna Kahena ‘Inspector Haroun’ au ‘Babu’ anatarajiwa kufanya shoo ya kuadhimisha miaka kumi ya ndoa yake, itakayofanyika Octoba 25 katika ukumbi wa Mpoafrika Devis Corner, Temeke Dar es Salaam.

Kiingilio katika shoo hiyo iliyopewa jina la ‘Usiku wa Wakongwe’ kitakuwa sh 5,000 na itaanza saa mbili usiku na kuendelea ambapo atasindikizwa na wakongwe kibao.

Akizungumza  jijini Dar es Salaam jana, Inspector alisema kuwa, anaomba mashabiki wa muziki wake wamwagike kwa wingi katika ukumbi huo kwa lengo la kupata burudani ilikwenda shule.

Alisema atasindikizwa na Luten Karama, TID Mnyama, Scorpion Giirlz (Isabela), LWP & Mabaga Flesh, Young Tuso & Drama Boy na Kimbiza Dj’s.

Inspector alisema kuwa siku hiyo atafanya shoo kubwa ambayo hajafanya kwa muda mrefu hivyo wapenzi wa kazi zake wanatakiwa kumwagika kwa wingi.

Mkongwe huyo alishawahi kutamba na ngoma zake kama Asali wa Moyo, Sharubu za Babu, Mungu ndio anapanga na nyingine nyingi ambazo zilimtambulisha na kufanya vizuri katika tasnia ya muziki huo.