Na Frank Joachim & DW
New York, Marekani
Mtu aliyekuwa na bunduki amewaua watu wasiopungua sita katika kitongoji cha Greenfield, kwenye jimbo la Wisconsin nchini Marekani jana wakati alipowafyetulia risasi waumini ndani ya hekalu la Wakalasinga wakati wa ibada.
Watu wengine watatu walijeruhiwa vibaya katika hujuma hiyo. Walioshuhudia wanasema mshambuliaji huyo alianza kufyetua risasi alipoingia jikoni katika hekalu hilo la makalasinga la Wisconsin, wakati wanawake walipokuwa wakitayarisha chakula.
Baadaye alipigwa risasi na kuuwawa kwenye mapambano makali ya risasi kati yake na afisa wa polisi. Polisi wamekieleza kisa hicho kuwa ni ugaidi wa ndani, lakini hawajabaini nia ya shambulizi hilo. Wakalasinga wapatao 500,000, wengi wao wa nasaba ya India, huishi nchini Marekani. Jamii ya Wakalasinga imeripoti ongezeko la mashambulizi dhidi yake tangu kufanyika mashambulio ya kigaidi mnamo Septemba 11 mwaka 2001 nchini Marekani.
Wakalasinga wameshambuliwa katika siku zilizopita kwa kuchukuliwa ni waislaam
Share this
EmoticonEmoticon