MAANDALIZI YA SENSA MAKETE YAENDELEA VIZURI.

Na Edwin Moshi.

Makete, NJOMBE.

Zikiwa Zimesalia siku Saba tu ,Imebainika kuwa maandalizi ya sensa ya watu na makazi wilayani Makete yanaendelea vizuri hasa wakati huu ambapo mafunzo kwa watekelezaji wa zoezi hilo yakiendelea kutolewa ngazi ya wilaya katika vituo vinne tofauti

Hayo yamebainika leo wakati kamati ya sensa mkoa wa Njombe ilipofanya ziara wilayani makete yenye lengo la kuangalia namna mafunzo kwenye vituo hivyo yanavyoendelea ikiwa ni pamoja na kuelewa changamoto zinazowakabili

Mmoja wa wakufunzi katika kituo cha Bulongwa kinachojumuisha tarafa mbili za Bulongwa na Magoma Bw. Fadhili Nkenza ameiambia kamati hiyo ya mkoa kuwa mafunzo yanaenelea kutolewa na kwa wale wanapoatiwa mafunzo ya dodoso refu kwa hivi sasa wanaendelea na mafunzo ya vitend ikiwemo kwenye kaya husika

Amesema katika kituo cha Bulongwa wanaopatiwa mafunzo kwa dodoso refu ni 58 na wanapatiwa mafunzo ya dodoso fupi ni 53 na wote ni kutoka kwenye tarafa mbili za Bulongwa na Magoma

Amesema kuwa kwa sasa wanandelea na mafunzo na wamefikia kwenye hatua nzuri na ni lazima wayamalize kwa wakati kama ilivyopangwa kwenye muongozo

Akizungumzia changamoto zinazowakabili wakati wa utekelezaji wa mafunzo hayo, Bw. Fadhili amezitaja kuwa ni pamoja na upungufu wa vifaa (vifutio na penseli aina ya 2HB), mabegi kwa ajili ya kutunzia vifaa walivyokabidhiwa makarani hao wa sensa, pamoja na majina ya watu maarufu yaliyoandikwa kwenye ramani kukosewa hivyo kuwa ngumu kuwatambua ama kuwapata watu hao

“kuna ramani tulizopewa zenye kuonesha maeneo mbalimbali lakini katika ramani hiyo kumeandikwa majina ya watu maarufu hivyo majina mengine yamekosewa kwa mafano unakuta mtu huyo maarufu amaitwa Fadhili Sanga lakini kwenye ramani pameandikwa Fadhili Chaula, sasa huo ni mkanganyiko pindi unapomtafuta humpati” alisema Fadhili

Ameongeza changamoto nyingine kuwa ni pamoja na malipo ya darasa la dodoso refu kuchelewa, hamasa kwa jamii kuwa ndogo, baadhi ya viongozi kutofahamu maeneo mengi wanayoyaongoza, ukubwa wa kazi lakini malipo ni kidogo, E.A kuvuka mipaka ya kata (kwa kata ya Kipagalo na Bulongwa) pamoja na changamoto ya wengi kusafiri kwa usafiri wa pikipiki na magari binafsi, hali inayopelekea usumbufu wakati wa kurejshewa nauli zao kwani hawana risiti kutokana na maeneo wanayotoka kukosa usafiri wa basi

Pia ameitaka kamati hiyo ya sensa wilaya kuangalia namna ya kuwasaidia wakufunzi hao kutolipwa sawa na wanaopatiwa mafunzo kutokana na kazi wanayoifanya wakufunzi hao ni kubwa lakini wanalipwa sawa

“Sisi wakufunzi tunatoa mitihani, bado tunabaki usiku tukiisahihisha na pia muda wote tunatoa mafunzo tukiwa tumesimama, kwa kweli tuoneeni huruma, lipelekeni hili mkoani muone namna ya kufanya kwa kweli” alisema Fadhili

Hata hivyo kamati hiyo imesema itazifikisha mara moja changamoto hizo mkoani na kuona namna ya kuzitatua kwani lengo ni kufanikisha zoezi la sensa kama ilivyopangwa na serikali, huku ikiwataka wakufunzi hao kutekeleza majukumu yao kwa kadri ya uwezo wao kwa sasa licha ya changamoto zinazowakabili

Kamati hiyo kwa hii leo imetembelea vituo viwili vya Iwawa na Bulongwa